i frog mi

 

wia do di eischoitkwotn waradn

 

wauns an wüdwestfüm schbün

 

wo si da höd und da bese wichd

 

am schlus an oan disch zaumsetzadn

 

und bei ana gewoitfrein komunikadsjon

 

und a boa schpritza und an schnops draufkamadn

 

dass olle zwoa a schware kindheid ghobd hom

 

und ois schoudaun gangadns dan

 

in a psüchoterapi

 

 

 

 

i frog mi

 

ob des wiagli woa is

 

dassd beim uniwersum wos beschtön kausd

 

wia bei amadson, owa one intanet

 

und wöche kreditkortn i do brauchat

 

und ob i den parkplodz dan a bewertn derfad

 

wei fia an untam baam gabad i fünf schterndal hea

 

wei mei autokraxn hod jo koa klimaonlog ned

 

und fia schterndal ziagad i dan wieda o

 

wauns a döön indn lak einihauad

 

di kastanije

 

 

 

 

i frog mi

 

des

 

waun i

 

dositz

 

am kuchldisch

 

mid a boa fliagn

 

mid an kuglschreiwa

 

mid an doschnrechna

 

und i ausrechna muas

 

fiad düngaberechnung vom öpul

 

fias ausuacha umd fördarungn vo da ama

 

wiavü meine schof scheissn

 

 

 

so iwas joa

 

so im duachschnid

 

und wiavü davo dass im schdoi scheissn

 

und wiavü davo dass auf da woad scheissn

 

so iwas joa

 

so im duachschnid

 

 

 

 

weu wauns lebn

 

grod so an fadn woidza schbüd

 

so an richdig fadn

 

daun muasd mid deine gedaunga

 

im hirn a bissl gegnschdeian

 

weu sunsd drasd duach

 

owa so richdig